Year: 2025

Direktiva di Fundashon Alzheimer Bonaire a kontinuá djabièrnè último, 19.00 or ku su programa di aña na Captain Don’s Habitat ku un anochi di informashon.
Resientemente Sentro Akseso Boneiru a introdusí su Lokèt Aksesibel i direktiva di Fundashon Alzheimer Bonaire a aserká direktiva di e Sentro pa tene un presentashon di esaki su servisio i posibilidatnan na e grupo di enfoke di miembronan di famia di FAB i tambe otro dunadónan di kuido kaluroso na personanan ku demensia.

Sra Tamara Janga-Nicolaas, Lider di e Tim pa Trabou Sosial i sra Jurna Clarenda, Lider di e Proyekto Lokèt Aksesibel tabata dispuesto pa hasi esaki i nan a kumpli ku esaki na satisfakshon di tur e presentenan i di Direktiva di FAB.

Direktiva a entregá papel i pèn na entrada di e sala pa esnan ku tabata desea pa nan preguntanan keda anónimo por a nota nan, pa haña kontesta despues.
Mayoria a apresiá esaki i tabata agradesido ku por a ofresé nan e posibilidat aki.
Normalmente ta sera e anochi alrededor di 20.45 or, pero e anochi aki ta te 21.15 por a kaba kontestá tur e preguntanan.

Tabata un anochi hopi bunita ku masha hopi informashon pa e dunadónan di kuido kaluroso, e interesadonan entre otro tambe algun otro kolaborador den kuido.
Na final sr Evert L. Piar a ekspresá na nòmber di direktiva di FAB su apresio pa e oradornan ku a duna nan tempu liber durante e anochi aki, pa a ofresé un presentashon ku asina tantu informashon importante i balioso tokante nan aktividatnan durante oranan di ofisina di Lokèt Aksesibel.

Esnan presente, e oradornan i direktiva ta mira atras riba un anochi bon bishitá i fruktífero.

Anekso un pòrtrѐt di e anochi

Djaweps 13 di mart un delegashon di direktiva di Fundashon Alzheimer Bonaire a bishitá Diputado di Salubridat Públiko Nina Francees-den Heye pa a entregá Diputado e rapòrt “Dementiemonitor Bonaire 2025”. Esaki ta resultado di e proyekto “Dementie Monitor 2024” ku Fundashon Alzheimer Bonaire a lansa aña pasá den koperashon ku Alzheimer Nederland ku ta e instituto di investigashon Nivel na Hulanda.

E investigashon tabata spesialmente dirigí riba e dunadónan di kuido kaluroso (mantelzorg) den 2024, ku na e momentu ei tabata aktivo. Algun dunadó di kuido kaluroso di kual e persona ku nan tabata kuida a fayesé na momentu dje proyekto, tambe por a partisipá na e investigashon.
E investigashon a konsistí di un lista ku pregunta ku tabata tantu online (Hulandes) komo riba papel (Papiamentu) for di fin di mei te ku medio yūni 2024. Ku un total di 64 rèspòns ku a pasa e drèmpel di 50, direktiva ta masha agradesido i orguyoso.

Deseo di direktiva di Fundashon Alzheimer Bonaire ta, pa tantu nos Gobièrnu lokal komo Gobièrnu di Reino i tambe e kadena di partners den kuido kaluroso lo bai hasi bon uzo di e resultado dje rapòrt aki, komo ku esaki lo ta sigur na benefisio di kalidat di kuido pa nos hendenan ku demensia na Boneiru..

Na momentu di entrega di e raport tabata presente direktor interino di Samenleving en Zorg sr Gerold van Elshuis , Programmamanager Ketenzorg ouderen drs Danielle van der Linden tambe, Hefe di Salubridat Publiko dr Nicolette Verduin tabata diskulpa i di parti di direktiva di Fundashon Alzheimer Bonaire presidente sr Evert L.Piar, vice presidente sra Henna Winklaar, segundo sekretario sra Gerladine Dammers i miembro di direktiva sra Maria Frans-Schermer.
Tabata un enkuentro kòrtiku pero fruktífero durante kual a trata eksperiensia ku kuido i kon duna sostén, peso di kuido i kalidat di bida mirá for di perspekiva di dunadónan di kuido kaluroso.
Direktiva ta bai atendé ku repartishon dje rapòrt i despues por hañ’é tambe riba website di FAB
www.alzheimer-bonaire.com.

Riba pòrtrèt Diputado, direktor interino di Samenleving en Zorg i miembronan di delegashon di direktiva di Fundashon Alzheimer Bonaire.

Komo parti di su Programa di aña 2025 direktiva di Fundashon Alzheimer Bonaire a organisá un workshop na Kas Karko djasabra último, 15 di februari di 9.00or te 14.00or. E workshop tabata pa miembronan di famia di personanan ku demensia i e tema prinsipal tabata “Kon ta dil ku emoshon”.
Por a partisipá maksimal 60 persona i a sosodé ku for di djaluna 10 di februari ya kaba a yega na e máksimo di inskripshon.

Ora direktiva konsiderá e interes di e kantidat di persona ku kier a inskribi despues i ku no por a partisipá i tambe e eksperensia di djasabra ultimo, direktiva a desidí mésora pa pronto organisá e workshop aki atrobe, pa asina tur esnan ku tabatin tantu deseo pa a tuma parti, haña otro oportunidat pa partisipá.

Esaki tabata ademas otro prueba ku tin tantu nesesidat pa tipo di workshop asina.

Partisipashon tabata grátis i komo muestra di gratitut direktiva a ofresé tur partisipante un lunch pa e bon kuido ku nan ta duna nan sernan stimá i tambe pa nan tempu i esfuerso pa a bin partisipá.

Entre e partipantenan tabatin 11 persona ku demensia i direktiva a logra regla e ora ei di tal manera ku e personanan aki por a bai den un otro sala pa a asistí na un otro tipo di seshon bou di guia di un koperador dunadó di kuido, pa asina nan famianan por a bai partisipá trankil na e workshop.

E workshop tabata bou di guia hopi profeshonal di sra Marije Veensta, sikólogo pa hende di edat i trahadó sosial sra Naidy Marchena.

Na final e partisipantenan a ekspresá kon eksitoso i fruktífero nan a eksperenshá e workshop.

E partisipantenan tur a risibí un sertifikado di direktiva di FAB i sra Veenstra i sra Marchena a risibi un regalito komo muestra di gratitut pa nan koperashon.
Direktiva i boluntarionan ku a hasi posibel pa FAB por a organisá algu asina pa promé biaha, por mira ku satisfakshon atras riba un evento hopi eksitoso.

Riba e pòrtrèt por mira e partisantenan, miembronan di direktiva i e guianan di e workshop.

Direktiva di Fundashon Alzheimer Bonaire tin e tradishon pa organisά su “ Masha danki Party” pa honra su boluntarionan na prinsipio di un aña nobo.

Djabièrnè último 17 yanüari esaki tabata e kaso atrobe. E biaha aki den sala Triton di Van der Valk Plaza Bonaire Resort. E aña aki no tabata solamente pa boluntarionan ku tabata mas envolvi den e aktividatnan durante aña 2024, pero tambe pa esnan ku a duna un aporte èkstra komo boluntario, espesial komo aktor den komedia “Ta brueria of Alzheimer” durante sèptèmber, luna  Mundial di Alzheimer. Direktiva a para ketu na e echo ku sin e kontribushon i sostén di nos boluntationan durante aña pasά, esaki lo no por a resultά un aña asina eksitoso i fruktifero.

E dies aktornan/boluntarionan ku a sobresali ku nan aktuashon den aña 2024, a risibi durante e reunion ameno akí, e feneta di FAB “Amigu di FAB” ku a introdusi resientemente i un regalo spesial pa e okashon aki di parti di direktiva, opsekiά pa presidente sr. Evert L. Piar.

E 10 aktornan/boluntario aki ku a lusi tabata Rocío Chavez Meza; Yelitza Josefina; Jessica Frans; Benaia Gijsberta; Anais Sakoetoe i señornan Gilberto Martis; Reksel Engelhart.

Ta lάstima ku señora Xiolimar Perez tabata den eksterior, miéntras sra Edith Britt i sr Johnrick Anthony tampoko no por tabata presente. Pa medio de esaki direktiva ke gradisi tambe kòrdialmente tur e otro boluntarionan ku no por tabata presente pa nan koperashon i sostén den 2024 i ta spera ku den 2025 tambe por sigui konta ku nan.

Riba e pòtrèt por mira e boluntarionan ku tabata presente, e miembronan di direktiva di Fundashon Alzheimer Bonaire i tambe e siete personanan ku a lusi komo aktor.