Alzheimer-Bonaire

Ku orguyo Fundashon Alzheimer Bonaire ta anunsiá lantamentu ofisial di Stichting Clini Clowns Bonaire. Ku masha orguyo komo ku FAB tabata inisiadó di e proyekto akí i ta tambe esun ku a kana e kaminda i a hasi e preparashonnan pa yega na e fundashon.

Esaki FAB no por a logra sin koperashon di e sostenedónan di e inisiativa ku ta Fundashon Mariadal, Zorg en Welzijn Groep, FKPD i tambe Stichting Clini Clowns Curaçao.

Ta for di komienso di aña pasá na februari a kuminsá ku e preparashonnan i a tene vários reunion ku inisiadónan, tambe ku potensial kandidatonan pa direktiva. Stichting Clini Clowns Curaçao ademas a sostené Boneiru den formulashon di statuto, proposishon di treinen i deskripshon di funshon pa prospekto cliniclownnan.

Djaweps 9 di yüli 2026 a kosechá fruta di tur e esfuersonan akí ora ku direktiva nobo di Stichting Clini Clowns Bonaire a firma akta di lantamentu serka notario.

E direktiva ta konsistí di Shanine Cicilia komo presidente, Senaida Hart visepresidente, Milena Cicilia tesorero, Zurishaddai Tremus sekretario i Marciano Silberie komo miembro di direktiva.

FAB ta deseá e direktiva nobo tur klase di éksito i ku despues di inskripshon na Kámara di Komèrsio nan sa di trese un era nobo riba tereno di kuido pa grandi i chikí na Boneiru.

Riba e potrѐt sintá e direktiva i pará e notario ku presidente di konseho di supervishon di FAB.

Djasabra último Fundashon Alzheimer Bonaire a kontinuá ku su programa di aña 2026 di 10.00or-12.00or di mainta na Club di ABVO.

Direktiva di Union di Penshonado Karibe Hulandes (UPKH) a invitá sra Henna Winklaar, kende ta miembro / direktor di FAB i tambe penshonado case manager Demensia, pa tene un presentashon pa UPKH su miembronan ku e tema:”Demensia i rekonosé su señalnan”.

Mésora direktiva a bai di akuèrdo i a aseptá e invitashon aki, komo ku e ta kuadra presis ku FAB su programa di akshon pa 2026, esta den e seri di e tayérnan:“Ser mas amabel pa ku Demensia na Boneiru”, ku a organisá último lunanan pa diferente empresa/ banko.

No solamente e gran kantidat di miembro di UPKH, sino tambe tur e introdusidonan a gosa di e diferente teps i informashonnan. Esaki a sali bon na kla pa tur e preguntanan di parti di e presentenan i tambe nan eksperiensia ku nan a kompartí ku Henna i e públiko.

Henna no a duna solamente un bon aklarashon di e 14 faktornan di riesgo, sino tambe splikashon di importansia di un estilo di bida saludabel, tantu pa hende di mas edat, komo pa esnan mas hóben. A keda palabrá ku direktiva di UPKH ku FAB lo duna nan material nesesario pa nan por komparti ku e miembronan ku no por tabata presente.

Direktiva ta mira atras riba un mainta di informashon hopi fruktífero i Henna a gradisí no solamente e miembronan pa nan presensia i interes, sino tambe sr Cicilia, vice presidente di UPKH pa e invitashon, lokual tabata un bon oportunidat pa aki riba nos dushi Boneiru nos por a komparti hopi tokante Demensia.

Riba e pòrtrèt tin esnan presente durante e presentashon di sra Henna.

Djárason último, riba petishon di maneho di Maduro & Curiel’s Bank (Bonaire) N.V., direktiva di Fundashon Alzheimer Bonaire a organisá un tayer “Krea simpatia pa demensia na Boneiru“ na Captain Don’s Habitat di 19.00 te 21.00 or’ pa 40 di nan kolaboradónan ku no por a asistí na e promé tayer di FAB den febrüari. Direktiva a bai di akuerdo ku e petishon i a skùif su di tres tayer pa luna di mei. Mientrastantu a risibí petishon di otro empresa i instituto pa nan personal ku ta den kontakto direkto ku kliente.

Sentral tabata atrobe e tema “Tras di e komportashon: komprenshon pa hende ku demensia. Siñalá i aktua”, presentá di un manera maestral pa Sra. Henna Winklaar, direktor di FAB i casemanager demensia penshoná.

E tayer siñalá i aktua dirigí ta importante pa kolaboradónan di banko pasobra den práktika regularmente nan tin di aber ku hende ku demensia i ta p’esei nan mester ta bon informá. Dos kolaboradó den kuido a asisití Henna i a modelá situashonnan ku por topa den banko.

Presentenan, di kua algun di nan a partisipá tambe den e tres weganan di modelo, tabata masha satisfecho i a haña e tayer edukativo tambe. Komo prueba di partisipashon partisipantenan a haña un sertifikado i tambe dos banner di FAB pa kologá den nan branchnan.

Lo sigui mas tayer den lunanan binidero, teniendo kuenta ku mishon di FAB pa huntu dal stap den direkshon di un komunidat simpátiko pa demensia na Boneiru.

Riba potrѐt personal di MCBB ku nan sertifikado i Henna Winklaar

Komo parti su programa anual di 2026 direktiva di Fundashon Alzheimer Bonaire a organisá su promé tayer djabiѐrnѐ pasá “ Dementievriendelijk worden op Bonaire“ na Sentro di Bario Tera Kòrá di 9.00 te 12.00 or pa personal di bali i pa personal ku ta traha na e kuater bankonan na Bonaire i tambe pa miembronan di Kuerpo Polisial H.K., kendenan ta e personanan ku tin kontakto direkto ku e klientenan.
Senntral e mainta ei tabata e tema “ Achter het gedrag: begrip voor mensen met dementie. Signaleren en handelen”
E partisipantenan presente di e bankonan i tambe un kolaboradó di Fundashon Cas Boneriano a sigui e tayer ku tabata dirigí spesialmente riba e meta: señalá mesora i aktua dirigí i pa hasi esaki mester ta bon informá.
E presentashon tabata den man di e casemanager demensia penshonado Sra. Henna Winklaar, aktualmente direktor di FAB. Presentenan tabata satisfecho i a haña e tayer partikularmente edukativo.
E aña akí lo sigui dos tayer mas, djasabra 25 di aprel pa 15.00 uur pa personal di SZW, Fundashon Mariadal Apotheek i PCN. E último ta riba djasabra 27 di yüni 2026 pa asistentenan di dòkter di kas i pa e casemanagernan di sosten sosial ku lo haña nan invitashon na debido tempu.

Athunto un potrѐt di e partisipantenan ku nan sertifikado

Tradishonalmente direktiva di Fundashon Alzheimer Bonaire ta organisá su “Masha danki Party” na komienso di aña, pa duna atenshon na su boluntarionan.

Esaki tabata tambe e promé aktividat pa 2026 i djabiѐrnѐ último, 16 di yanüari pa 19.00 or na Resort Bonaire, a invitá e boluntarionan ku tabata mas inbolbí durante 2025. Direktiva a para spesialmente ketu na e echo ku sin kontribushon i sosten di e boluntarionan, e aña ku a pasa lo no tabata asina eksitoso.

A yama e tres boluntarionan dilanti, ku direktiva a skohe komo esnan ku mas a sobresalí durante 2025, pa tuma nan sertifikado, feneta di FAB “ Vrienden van FAB” i tambe un regalo ku direktiva a skohe spesial pa e okashon akí, for di man di representantenan di FAB, Sra. Henna Winklaar , Sra Gerladine Dammers i Sr. Evert L. Piar.

E tresnan ku a sobresalí ta Sr. Jefferson Rosalia di Eagle Eye Media ku huntu ku Intensity ta organisá for di 2022 Alzheimer Awareness Walk den sѐptѐmber, Luna Mundial di Alzheimer, Sra. Marije Veenstra, sikólogo di grandi, for di febrüari 2024 masha inbolbí ku aktividatnan di FAB i Sr, Moises Avellaneda, ku tambe a sobresalí den 2025 ku trabou boluntario pa FAB; tabata un lástima ku Sr. Avellaneda no tabata na Boneiru i pues no por tabata presente djabѐrnѐ anochi.

Direktiva ta wak bѐk riba un anochi masha eksitoso i ke gradisí tambe e otro boluntarionan ku no por tabata presente, pa nan kolaborashon i sosten den 2025 i ta spera ku den 2026 tambe por sigui konta ku nan.

Riba e potrѐt boluntarionan ku tabata presente i miembronan di direktiva di Fundashon Alzheimer Bonaire, i tambe e dos boluntarionan ku a sobresalí .

Direktiva di Fundashon Alzheimer Bonaire, despues di un Luna Mundial di Alzheimer masha eksitoso, sѐptѐmber, a sigui ku su programa anual   anochi pa 19.00 uur ku un anochi di informashon presentá pa un eksperto eksperensiá Sra. Mireya M. Ostiana-Wijman di Henry Ostiana Foundation establesé na Hulanda pero ku un kolaborashon estrecho ku Sint Maarten, na Captain Don’s Habitat pa kuidadónan informal i tur interesado. A lanta Henry Ostiana Foundation despues ku Sr. Henry Ostiana na 2011, komo konsekuensia di tres infarto di selebro, a haña e diágnosis Demensia Vaskular. E fundashon tin komo meta haña konosementu i eksperensia pero tambe pa kolekshoná mas tantu posibel medio pa kompartí ku otro isleño i pa oumentá konsiensia pa Alzheimer/Demensia.

Oradó Sra, Ostiana ta konosí na Sint Maarten pero tambe na Hulanda unda e ta tene charla pa e.o. Alzheimer Nederland. Komienso di aña direktiva a invit’é sabiendo ku sѐptѐmber semper e ta na Sint Maarten en konekshon ku Luna Mundial di Alzheimer i e aktividatnan ku tin ei, pa kompartí na Boneiru su eksperensia komo ѐkskuidadó informal i su storia personal.
Tema di e anochi tabata “Stimando miéntras mi ta lubidá… Alzheimer” òf “Lief hebben terwijl men zich zelf vergeet … Alzheimer.”

Tur e informashonnan akí ta pas bon den e kuadro di strategia di Fundashon Alzheimer Bonaire pa duna komunidat mas publisidat i komprenshon pa e tema di Luna Mundial di Alzheimer e aña akí “ Puntra tokante Demensia # Puntra tokante Alzheimer“. Sra. Ostiana ke yuda miembronan di famia si nan ke papia di nan situashon, nan por yam’é na telefòn i esei presentenan a apresiá mashá.

Tabata un anochi bunita pa kuidadónan informal i interesadonan, bou di nan algun kara nobo. A hasi bon pregunta i tabatin un interakshon perfekto durante kua e tema a bini dilanti.

Presentenan, oradó i direktiva ta wak bѐk riba un anochi di informashon bon bishitá i eksitoso.

Athunto un potrѐt di e anochi

Djadumingu 21 di sѐptѐmber pa 19.00 or riba Dia Mundial di Alzheimer, direktiva di Fundashon Alzheimer Bonaire (FAB) tabatin su aktividat den kuadro di Luna Mundial di Alzheimer, spesial pa kuidadónan informal i formal i famianan di personanan ku ta biba ku demensia, un anochi di alabansa titulá “Dios ta mi forsa pa sigui”. E aktividat akí tabata grátis i a tuma lugá den Corallium Hotel and Villas, konforme programa di FAB.

Den un sala bunita dekorá algun kantante lokal i Koor Coromoto a trese nan kanto komo aporte na FAB i su invitadonan.
Públiko tabata konsistí di personanan ku ta biba ku demensia, kuidadónan informal, profesionalnan di kuido, spesialistanan i miembronan di famia i tur a gosa intensamente di un bunita anochi.

Direktiva ta wak bѐk riba un anochi eksitoso unda invitadonan a gosa di músika, di kanto i di e ambiente den sala. Presidente Sr. Evert Piar a gradisí e boluntarionan ku a organisá e anochi bou di guia di vise-presidente Sra. Henna Winklaar, i tambe nos artistanan lokal kendenan a aktua gratuitamente pa e meta akí.

Mas aleu presidente a rekordá presentenan ku ainda tin dos aktividat riba programa pa klousurá Luna Mundial di Alzheimer, djasabra awor 27 di sѐptѐmber di 9.00 pa 15.00 or na Kas Karkó Playa tin posibilidat pa hasi Tѐst di Memoria. E tѐst ta grátis i no tin nodi di traha sita. Djadumingu 28 di sѐptѐmber pa 6.00 or tin e 5 km Alzheimer Awareness Walk ku ta kuminsá na Cargill Salt Co, direkshon pa e kasitanan di katibu i bѐk.